Heb 1 | HUI | STEP | Bambaore Ngode Datagaliwabehanda inanaga mamali heneruhondo bi dewa haluore lamigi bialubi walia dewa tara taraore halubi ibunaga manalatagi haga hearuha howa ani bigi bialu hene.

a 1.2Iba 2.8, Yo 1.3, Eb 1.10

b 1.3Ab 2.33-34, 2 Ko 4.4, Kl 1.15-17, 1.20, Hi 8.1, Mo 4.11

c 1.4Eb 1.21, Pb 2.9-10

d 1.52 Sml 7.14, 1 Bit 17.13, Iba 2.7, 89.26-27, Ab 13.33, Hi 5.5

e 1.6Lm 8.29, Kl 1.18, 1 Pi 3.22, Mo 1.5, 5.11-14

f 1.7Iba 104.4

g 1.8-9Iba 45.6-7

h 1.9Ais 61.1, Ab 4.27, 10.38

i 1.10-12Iba 102.25-27

j 1.11Ais 34.4, Md 24.35, 2 Pi 3.7, 3.10

k 1.13Iba 110.1, Md 22.44, Mg 12.36, Lg 20.42

l 1.14Iba 34.7, 91.11, Md 18.10, Ab 12.7, Lm 8.17, Ya 2.5, 1 Pi 3.7

Hebrews 1

Ngode Datagaliwabehanda ibu Iginiha howa bi lenego ogo

1 Bambaore Ngode Datagaliwabehanda inanaga mamali heneruhondo bi dewa haluore lamigi bialubi walia dewa tara taraore halubi ibunaga manalatagi haga hearuha howa ani bigi bialu hene. 2 Ani binigo horo áyu kamarunaga Ngode Datagaliwabehanda ibu Iginiha howa ina bibahendehondo bi langialu henego ka. Ngode Datagaliwabehanda ibu Iginiha howa dindi bibahendehabi hari daligahabi bibahendeore wabiai hene. Ani bialu ibugua bibahende wabiniyaruni Igini ogoni ibuninaga hai helo Ngode Datagaliwabe ibunime ibu dabo helene. ^a 3 Ani bialu Ngode Datagaliwabe ibuni wá baya taraorehe kagobi ibu Iginihabi wá ogoni hatagi halu kagoni. Ngode Datagaliwabe ibuni kagobiore ibu Igini kagoni. Ibugua ibunaga bi gibi hongohe ngagome dindiha ngarubi hari daligaha karubi ina kamarubi bibahendeore ibuni yania hai ho kagoni. Ani bialu ibugua wali agali bibahendenaga ko domo waholenaga ibugua halu mbira hangu homo aribia halu ibu dahuliya andaga Ngode Datagaliwabe hongo gibiorehe kagonaga gi tigahayagi pu berenego beda. ^b

Ngode Datagaliwabe Igini ibu daliga timbuniore kago ogo

4 Igini ogoni ibu dahuliyali karubi ndo daliga helonaga helene. Ogonidagua dege Ngode Datagaliwabehanda Igini ogoninaga minibi dahuliyalirunaga mini dindiha lowa ibunaga daligaore wini. ^c 5 Anigo Ngode Datagaliwabehanda ibunaga dahuliyali karu mbiralihondo lalu, ^d

Í̠ i̱ Iginiore kegoni áyu í̠ aba i̱ harogo,
lalu ogonidagua naleore dege ka. Bi mendebi Ngode Datagaliwabehanda dahuliyali karu mbiraligo mitangi bialu lalu,

I̱ Igini ibu helo ibu aba i̱ holebero,
lalubi ogonidagua nalene dege ka. 6 Ani nale howa Ngode Datagaliwabehanda ibu Igini mbiraoreore henego dindini ibilalu howa lalu, ^e

Ngode Datagaliwabenaga dahuliyali karu bibahendeme ibu mitangi bialu ibunaga mini yaraga halu holene nga,
lene. 7 Ai Ngode Datagaliwabehanda dahuliyali karunaga mitangi bialu ogodagua lalu, ^f

Ngode Datagaliwabehanda ibunaga dahuliyali karuni puyabu pulagane helalu
ibunaga biabe bia haga karu ira hungu biagane helaga,
lene. 8 Ani lenego Ngode Datagaliwabehanda ibu Igininaga mitangi bialu ogodagua lalu, ^g

Ngode Datagaliwabe-o í̠na wali agali karu handame howa haru haabobo bu holebere.
Í̠na í̠naga wali agali karu handame howa haru halu tihondo tigatiga hanunigo bialu kegoni.
9 Í̠na mana tigabi hanuniore bulenego gubalini howa mana ko bulenego hame naleore kegoni. ^h
Irane ogoninaga í̠naga Ngode Datagaliwabe ibugua í̠ dabalu
í̠naga nenege karuhondo turu holene midagobi ndo
í̠naga mini yaraga halu í̠hondoore turu holene daliga ngidagoni,
lene. 10 Ibugua bi mendebi agua lalu, ⁱ

Anduane Homogo-o í̠na piganengi dindi wabialu
í̠ninaga gime hari daligaha karubi wabirigoni.
11 Uruni bibahende ereba hai holebira. ^j
Aga bu henego goba halu ereba hagadagua ereba haragola í̠ni ha ho wiaabo holebere.
12 Dindibi hari daligabi bibahende í̠na aga pau lagadagua pau lalu
aga karulenego golalu mendego karula aribia hagadagua aribia holebira.
Anigoyu í̠ni kegobi dege ha ho wiaabo halu í̠naga hamaro bulene nawuleore bira,
lene. 13 Ngode Datagaliwabehanda ibunaga dahuliyali karu mbiraligohondo ogodagua lene nawi, ^k

Í̠naga waitigi karu í̠naga geme hengedai habelo i̱na mo heloliya í̠ i̱naga gi tigahayagi ogoria birabe,
lalu ogonidagua nalagaore ka.

14 Aniyagua dahuliyali karuni ti agi aledabe. Ti dinini howa Ngode Datagaliwabenaga biabe biaga mbira wali agalime pele mulene yu helo lowa dahuliyali urunime biamogo bia helo Ngode Datagaliwabehanda dalilenego ka. ^l